Mat 23 | BEF | STEP | Alihi Yesu babu boana'i li gehesa hite minana hiti to ai'a koko pana'a hiti kaga ma luto beto hu epi'ehina:

Matthew 23

Felosi bomagi hiti to kaga enelepise bomagi hiti hapa'ani Yesu lu kuguma hu epolo'ehina

Mk 12:38-39; Lk 11:43,46; 20:45-46

1 Alihi Yesu babu boana'i li gehesa hite minana hiti to ai'a koko pana'a hiti kaga ma luto beto hu epi'ehina: 2 Kaga keheli bati huse bo hiti to Felosi bo hiti enali Mosehi keya kamofihi hapa'a lu hokolo hise minelata nehabe. 3 Ya hu'ehinagi enali kaga lu lepilete ya hilo ya hilo nelinogomo lenali enabaga liyafa hite enemege'i melete minalo. Ya hu'ehina mone'naya enali bati mehina suhi li huto nehinogomo lenali ana hapa'amofihi enemege'i memalalo. Enali babu kaga fato fato'i lilata nehanaya ana kaga enali'ani mege'i melelata menehabe. 4 Enali kaga lu keta fi epilete enali'ani mino saga hi'ehite enayatu meenehe'melata nehabe. 5 Asaga'na li huto hilata nehanaya enali bona'magi bu galabe lite li huto hilata nehabe. Enali mono ka fayahi ge'ahanana enogo gobisalo li hekelela to numuna fayahi ge'ahanana enayanugu sahi bila to yatama gukete'aniga naga ilago limila hite li hekelelata nehabe. 6 Mono nonugu enali Felosi bona'magi kefa hisa bati hinalo bona folaganugu mino saga hite nehago asaga bona'magi lenebe tigite lenigitini bona enubulo li saga hilata nehabe. To asaga bona'i li gehesa hite nose'na nete minelata nehanagu ana hilata nehabe. 7 Enali bona'magi folagaha'anigu bite ho tite nehago asaga bona'magi enofokehi lite enugufaga soso hu epelelete Tisao lite ligiti halabe lite hilata nehabe. 8 Ya hu'ehina lenali kumu'i Tisao lite lenigi meheno. Moneko bo nohina aisigo tisa botini nohibe, ya hu'ehinagi lenali koguna ite minalo. 9 To ma melugu bo mone'mofihi afotifu yabe lite gi mehalo. Afotinifu moneko'isi ai'asigo kokulumalugu nohibe. 10 Enali lenikibina bona'i yabe lite lenigi memeleno. Lenali kibina botini mone'isi nohina ai Mesia nohibe. 11 Ya hu'ehina lenali folagahatiniguti kaba botini ai lenali koko panatini mineno. 12 To bo moneuba gi'a li saga huloto hutu hata hilina ai gi'a alihi melugu limo ilina'mu yabe. Bo moneuba gi'a li saga mehuse legeso huto minalina alihi sipi gihiti bo minalina'mu yabe.

Tisa bona'magi foipana hi'ahanamofihi hapa'ani Yesu lu hokolo hu epolo'ehina

Mk 12:40; Lk 11:39-42, 44, 52; 20:47

13 Lenali kaga keheli bati hulata bo hiti to Felosi bo lenali, ehetinio, kaba hite mino sepa ite minalo. Lenali loe ka luse bo nehabe. Lenali boana'magihi enubulo kokulumamofihi kasiha'a li hekini lelata nehabe. Lenalitini ana kapo'alo metise nehite boana'magi tilune'mu nehana ana kapo lenali li hokolo mehi epelelata nehabe.

14 Lenali keya kaga keheli bati huse bo hiti to Felosi bo, ehetinio, lenali kaba hite minalo. Lenali loe lenabaga hiti bo yabe. Lenali keto ana'magihi nohi fe'noha'ani ka'i legelata bo yabe. To lenali ya'mana foipanatini yatama nunumu lilete ifi telata nehanabe. Lenali osahi lepilina'a hofa talibe.

15 Keya kaga kehelise bo hiti Felosi bo, lenali ehetinio. Lenali loe kaga lulata bo lenabaga kaba hilo. Lenali koko boti lilune lite mone bo ai mono kagatimofihi mege'i malalibe lite hege nagami beletoga to hepato hepato sa sa hilata bo yabe. Ya hite, koko panatini le'meletemo aku'i lenali logo kapolo lenalitini suhi lite le'mo melelata nehabe. Ya hu'ehina ai lenebege ligito babu luto foipana'a nominabe.

16 Lenali lenubutini pisi lina bomagita bona'i kapo enelepilune lite nehafiye? Ehetinio, lenali kaba hu bati hilo. Lenali ma lite lilata nehabe: Bo moneuba Hu'mamofihi mono noha'a gi holoto lusiga luto ifogati yabe lilinaya fa'mene yabe lilata nehabe. Ya hu'ehina bo moneuba fayaha'a lubo labo lina goli efapo gi holoto ma'naka luto ifogati Hu'mamofihi noha'a yabe lilina. Yalo ai ana lu'ehina ka'a mege'i moloto anana li huto hino. 17 Lenali lenubu pisi luto negi nagi bo. Henana ai sipina ni'ibe? Ai goli sipina ni'ifi to Hu'mamofihi noha'auba golimofihi le'mo lagaso nohibe? 18 To lenali ma lite lilata nehabe: Bo moneuba Hu'mamofihi emise nasana emilata nehana hita gi holoto ifogati ma'naka nolube nolina, ya bati huto yabe. Ya hu'ehina to emise nasana hitalo ninamofihi gi holoto ma'naka luto ifogati yabe lilina, yalo ai lu'ehina suhi lino. 19 Lenali lenubu pisi lina bo. Henana ai sipina ni'ibe? Ai emise nasana sipina to nasana hitauba emise'namofihi le'mo gi nobibe? 20 Ya hu'ehina to bouba ai Hu'mamofihi emise'na go emise hita gi holoto ifogati nolube lilina, ai asaga'na emise'na hitalo ninana hiti to ana hitamofi hiti kaga'amofihi lu amuya nomalabe. 21 To bo moneuba Hu'mamofihi mono noha'a gi holoto ma'naka luto ifogati nolube lilina, ai Hu'mamofihi sipi noha'a hiti to Hu'ma ana nonuga nohibe luto kehelito kaga'amofihi lu amuya nomalabe. 22 To bo moneuba kokuluma'i gi holoto ma'naka luto ifogati nolube nolina ai kefa hisa hiti to Hu'ma, anaga nomina bo hiti to bo ana kefa hisalo nohina'mu luto kaga'a lu amuya nomalabe.

23 Lenali keya kaga keheli bati huse bo hiti Felosi bo, ehetinio. Lenali loe kaga lilata bo lenabagatini kaba hu bati hilo. Asaga'na yuhufa foyagu ni'inana guna ite nayahi luga luga su hago melelete nayahi su hana'amofihi Hu'mamofihi emilata nehabe. Ya hi'ahana lenali asaga kaga nekisa'aga sipi loto ninamofihi he'milata nehabe. Bona'i enele'mo bati huse kagafi, bona'i hiti koguna ito minose'nafi to komopatini monetoga molosemofihi kaga hapa he'milata nehabe. Nayahi luga luga su hana bati'na ninaloti nesi'asi Hu'mamofihi emise kaga mehe'milutaya ma sipina ninauba li yege halibe. 24 Lenali lenubu pisi lina bo bona'i kapo enelepilune'mu nehafihe? Lenali guya nose'nagu ume'ume'i noagomo hesi nehe'mite to kameli yaga noagomo lenali fa'mene asaga'i mikili helata nehabe.

25 Keya kaga keheli bati hulata bo hiti to Felosi bo, lenali ehetinio. Lenali loe lenabaga hiti bo lenabaga kaba hilo. Lenali kohi to lape'i gupisa'a loko sese hilata bo. Ya nehite guminanatini hiti to lenugufalo ni'inanatu komopa'agu li bai telata nehabe. 26 Felosi bo lenali lenubutini pisi lu'ehina. Yata'a kohi komopa'a luga okala huto li gulu gulu luletogo alihi gupisa'aga hiti ana huto gulu gulu lilibe.

27 Keya kaga keheli bati huse bo hiti to Felosi bo, lenali ehetinio. Lenali loe lenabaga hiti bo kaba hu bati hilo. Lenali kene mala mala hepa'i koholi penitu'i nefalana'a hite nehabe. Fegutoga bu go bati huse'a ninaga to komopa'aluga filise bona felisa'anifi to asaga'na kolo tuba inana fato fato'i babu luto bai toto minolata nohibe. 28 Lenali ya'ma suhi lite nehabe. Bona'magi fegutoga lenugufa be gelete lenebebe sana bona'i nehabe lite lilata nehabe. Ya hana komopatinigu faga faga lusemofihi to kaga li gofa hosemofihi fato fato'i bai toto ni'ibe.

Tisa bomagihi osahi epilina Yesu lu huto hu'ehina

Lk 11:47-51

29 Lenali keya kaga kehelise bo hiti to Felosi bo, lenali ehetinio. Lenali kaga loe lulata bo kaba hu bati hite minalo. Lenali kaga leli'ali bomagihi kene mala mala noha'ani gi epelelata nehabe, to lenali bebe sana bomagihi kene mala malato lose tose kifi'na fato fato'i hekelelata nehabe. 30 To lenali ma lite lilata nehabe: Koyapa'i tatatigi mine'ahana kanagu lali minotitaya tatatigi enehe'moto kaga lu yege hose bo meenohotita'mu yabe. 31 Ya'mana kagauba lenalitini lu kuguma nohibe, lenali kaga lu yege helata nehana bo enoho fililata nehana bona'i ana naga'mo lenaliya nehabe. 32 Ya hite enali hapi fi'ahago lenali kehelite enemege'i melete ana suhi hime bilana'mu yabe. 33 Lenali osifa'i yabe. Lenali foipa osifa'mofihi yagapana'a yabe. Hu'ma ka foyagu lenele'mo malalinauba logo kapogu lenoho lifilina'mu yabe. Hena hite lenali koli felenogo Hu'mamofihi ka foyauba lenugufalo melilina ni'ibe? Lenali koli mehilana'a huto ni'ibe luto Yesu lu'ehina yabe. 34 Ya hu'ehinagi lenali kehelilo. Nani kaga lu yege hose bo luga'a hiti, to lataha'anigu kaga bati huto ni'ilina bo hiti to mono ka keheli bati hi'ahana bona'i hiti lenalitoga enoho lifinogo'ni bilana'mu yabe. Enali folagaha'aniguti luga'a enoho fililabe, to luga'a malipu yafalo enahalabe, to luga'a mono nohatinigu nehinogo naga osatu'i enibi yigilana'mu yabe. To lenali mone hepatoti enele'mo he'minogo fato hepalugu netinogo enegene mane ite enele'mo fato hepato malalana'mu yabe. 35 To enali komopa'ani bati hu'ehina bona'i melugu nehago luga'a bona'magi enoho fili'ahana, enali asaga ya'mana bona'magihi gumi'ani lenali lenugufalo pa salina'mu yabe. Bati bo Ebeli ai fili'ehina, ya hulago analoti oto Sekalaiya ai Belakaiyahi pana'a, ai'i lenali mono nohi folagaha'agu ho fili'ahana. Asaga ya'ma bomagihi gumi'ani lenalito oto pa salina'mu yabe. 36 Nani ma'naka luto lu nolepube. Asaga ya'mana gumi'animofihi foipa mina'auba yatai ma nehana boana'i enali enugufalo huto hilina'mu yabe, luto Yesu lu epi'ehina yabe.

Yesu Yelusale hepa kumu yibi hu'ehina

Lk 13:34-35

37 Hege, Yelusale bona'ise. Kaga lu yege hose bo kai enoho fililata hane, to Hu'ma lili'nalo bo kai kumu luto enoho lifigo limina kai efa kosatu enoho nofiline. Babu yupahi yagapanaka nani enele'mo nupa hilube'mu hulata nohube. To nala kokoleuba yagapana'a koketapa'aluga enele'mo nupa nohina suhi luto lenele'mo nupa hilube'mu nohunamo lenali melepesibe. 38 Lenali kehelilo, yatai hepatini fa'mene hepa'i yafa'a minalina'mu yabe. 39 Nani ya'ma kaga luto lu nolepunaya, lenali aku aku'i nani bu menegese mineme bite alihi yupaha'a ma lite lilana yupahi yabe, Sipi Bomofihi gi'alo o'ehina bo ai Hu'mau be tigilibe luto lu emilibe.